NEWYDDION

Aelodau Sgwad Sgwennu Gwynedd ar y Silff Lyfrau

Bydd dwy aelod ddisglair o Sgwad Sgwennu Gwynedd yn cael y cyfle i gyfrannu at raglen Y Silff Lyfrau gyda Kate Crockett ar Radio Cymru, a fydd yn cael ei darlledu nos Fercher, 7 Rhagfyr am 6.00pm. Bydd Grug Muse a Megan Hughes yn trafod eu profiadau o fod yn aelodau o un o Sgwadiau Sgwennu mwyaf gweithgar Cymru – o’r gweithdai lu gyda awduron a beirdd profiadol, i’r campweithiau y maent hwy a’u cyd-aelodau wedi llwyddo i’w creu yn ystod y sesiynau. Bydd Kate Crockett yn eu holi ynglŷn â’u harferion darllen, ac yn trafod uchelgeisiau’r ddwy awdures ifainc.

Gwen Lasarus, trefnydd Sgwad ‘Sgwennu Gwynedd fu’n holi Grug a Megan i’w paratoi ar gyfer y cyfweliad radio! :

Megan Hughes
Be ydi eich hoff bwnc? Hanes.
Be ydi eich diddordebau? Defnyddio fy iPod, chwarae gitar, dwdlo, dringo, teithio, darllen.
Be ydi eich gobeithion am y dyfodol ? Pensaer, Gwyddonydd, Cyflwynydd Teledu/Radio.
Pwy ydi eich arwr/es chi ? Darren Criss, JK Rowling, George North.
Be ydi eich hoff air ? Cymraeg - Clebran, Saesneg – Creativity

Grug Muse
Be ydi eich hoff bwnc? Ymm, hanes neu Cymraeg, anodd deud
Be ydi eich diddordebau? Chwaraeon, gwnio, fy nghlwb Ffermwyr Ifainc lleol, canu
Be ydi eich gobeithion am y dyfodol ? Mynd i brifysgol i astudio gwleidyddiaeth
Pwy ydi eich arwr/es chi ? Aung San Su Kyi, Gerallt Lloyd Owen, Thomas Jefferson, Amelia Earhart, Lowri Morgan, Paul Revere a T.H. Parry-Williams
Be ydi eich hoff air ? Calico
 

Blog Newydd i Eurig Salisbury, Bardd Plant Cymru

Eleni, am y tro cyntaf erioed, mae Bardd Plant Cymru wedi cael blog newydd sbon iddo ef ei hun! Bydd yn cofnodi ei helyntion, ynghyd â chyfrannu ambell i gerdd.

I ymweld â'r blog, cliciwch yma. Cofiwch alw yn aml i weld beth sydd gan Eurig i'w ddweud!

Llwyddiant i gyn-sgwadiwr : Llŷr Titus yn Cipio Coron yr Urdd

Llongyfarchiadau i gyn-aelod o Sgwad 'Sgwennu Gwynedd, Llŷr Titus, am ddod yn fuddugol yng nghystadleuaeth Y Goron yn Eisteddfod yr Urdd Abertawe eleni. Yn gynharach yn yr wythnos  daeth Llŷr yn drydydd yng nghystadleuaeth y Fedal Ddrama.

Mae Llŷr yn 18 oed, ac yn ddisgybl yng Ngholeg Meirion Dwyfor Pwllhelli yn astudio Cymraeg, Drama, Ffrangeg a Saesneg. Mae'n gyn-ddisgybl o Ysgol Botwnnog, a gobeithia fynd i Brifysgol Bangor i astudio'r Gymraeg ar ôl gorffen ei astudiaethau ym Mhwllheli.

Guto Dafydd o Gylch Arfon ddaeth yn ail yn y gystadleuaeth ac Anni Llŷn o Aelwyd y Waun Ddyfal, Caerdydd oedd yn drydydd.

Llŷr Gwyn Lewis yn Ennill Cadair yr Urdd

Yn fuddugol eto eleni yng nghystadleuaeth Y Gadair yr oedd Llŷr Gwyn Lewis, sydd yn wreiddiol o Gaernarfon ond sydd bellach wedi ymgartrefu yng Nghaerdydd. Dyma’r ail flwyddyn yn olynol i Llŷr fod yn llwyddiannus, gan iddo gipio’r gadair y llynedd hefyd yn Eisteddfod yr Urdd Ceredigion am ei awdl ‘Tonnau’.

Yn ogystal ag astudio ar gyfer doethuriaeth ar waith T. Gwynn Jones a W. B. Yeats, mae Llŷr ar hyn o bryd yn aelod o dîm Talwrn y Waun Ddyfal ac o dîm Ymryson y Disgyblion Ysbas.

“Yn ogystal â dawn, mae disgyblaeth gan y bardd yma. Nid yw’n gwastraffu geiriau, ac nid oes ôl straen na brys ar y casgliad,” meddai’r beirniaid.

“Mae’n bleser mawr i ni’n dau gael cadeirio bardd mor addawol. Mi fydd pobl yn mwynhau darllen a gwrando’r cerddi ardderchog hyn.”

Guto Dafydd o Arfon ddaeth yn ail yn y gystadleuaeth, a Sion Pennar o Eifionydd yn drydydd.

Eurig Salibury yw'r Bardd Plant Newydd

Cyhoeddwyd ar lwyfan Eisteddfod yr Urdd brynhawn Mawrth, 31 Mai 2011 mai Eurig Salisbury fydd Bardd Plant Cymru 2011-2013. Mae'n dilyn Dewi Pws, y bardd a'r digrifwr a fû'n teithio o amgylch y wlad yn cyfansoddi limrigau ac yn tynnu coes plant Cymru dros y flwyddyn ddiwethaf.

Meddai Eurig,

“Mae'n anrhydedd mawr iawn cael fy ngofyn i gydweithio gyda beirdd bach Cymru. Mi o'n innau'n fardd bach hefyd un tro, er nad o'n i'n gwybod hynny ar y pryd, ac mi o'n i wrth fy modd yn darllen cerddi gwirion. I ddweud y gwir, cerddi gan fy rhagflaenydd enwog dwi'n eu cofio orau, cerddi am foi o'r enw Arwel a oedd wastad yn dawel, ac am dorri wy gyda llwy! Cerddi llawn hwyl yw cerddi Dewi Pws, a fy nod i yw sicrhau y bydd plant Cymru'n cael yr un faint o hwyl gyda fi dros y ddwy flynedd nesaf. A gyda lwc, ni fydd fy nghorun i'n edrych yn rhy debyg i gorun Mr Pws erbyn y diwedd!”

I archebu gweithdy gydag Eurig, Bardd Plant Cymru, cysylltwch â barddplant@llenyddiaethcymru.org neu ffoniwch 029 2047 2266. Ond cofiwch mai cyntaf i'r felin yw hi, gan fod y Bardd Plant yn boblogaidd iawn!

Llenyddiaeth Cymru yn lansio cylchlythyr newydd Sgwadiau ‘Sgwennu’r Ifainc

Nôd Sgwadiau `Sgwennu'r Ifainc yw dod o hyd i ysgrifenwyr disglair ym mhob rhanbarth - boed hynny trwy gyfrwng y Gymraeg neu'r Saesneg - a'u cyflwyno i rai o brif awduron a thiwtoriaid creadigol Cymru. Yn dilyn llwyddiant gwefan y Sgwadiau ‘Sgwennu mae’n bleser gan Llenyddiaeth Cymru gyhoeddi lansiad cylchlythyr newydd fydd yn ymddangos bob deufis. Ynddo y bydd adroddiadau ar weithdai a fu, newyddion am weithgareddau y Sgwadiau, cyngor, cyfleoedd a phrosiectau cyffrous ar gyfer ysgrifenwyr ifanc. Mae wedi ei anelu at aelodau y Sgwadiau, cyd-drefnyddion, rhieni, athrawon, awduron, a threfnyddion digwyddiadau sy'n awyddus i hybu llenyddiaeth a chreadigrwydd ymysg pobl ifanc ac yn wir, unrhyw un arall â diddordeb yn symudiad y Sgwadiau.

Os gwyddoch am gyfle ar gyfer ysgrifenwyr ifanc, boed yn weithdy neu gystadleuaeth, ebostiwch y manylion i post@llenyddiaethcymru.org a byddwn yn ymdrechu i’w gynnwys yn y cylchlythyr nesaf ac ar y wefan.

Mae’n hawdd tanysgrifio: rhowch eich cyfeiriad ebost yn y bocs 'Tanysgrifiwch i Gylchlythyr Sgwadiau ‘Sgwennu'r Ifainc' sydd ar ochr chwith y sgrin a cliciwch 'Anfon'.

Cadair yr Ifanc, Eisteddfod Llanllyfni

Llongyfarchiadau mawr i Grug Muse, aelod o Sgwad `Sgwennu Gwynedd ar ennill Cadair yr Ifanc yn Eisteddfod Llanllyfni. Dywed Andrea Parry fod ei cherdd yn "gerdd delynegol hyfryd…rwy'n ffyddiog y gwelwn ei henw ar y sin farddonol yn gyson yn y dyfodol."Gellir darllen y gerdd 'Hedfan' yn y rhifyn cyfredol o Barddas, tudalen 18.

Llwyddiant i Gyn-Sgwadiwr

Braint enfawr i fudiad Sgwadiau `Sgwennu'r Ifainc yr Academi oedd clywed fod cyn-aelod o Sgwad `Sgwennu Gwynedd wedi dod yn ail yng nghystadleuaeth y gadair yn Eisteddfod yr Urdd Llanerchaeron, Ceredigion.

Cipiodd Gruffudd Antur, 18 o Lanuwchllyn, dair gwobr gwaith cartref am ysgrifennu barddoniaeth cyn clywed wedyn iddo ddod yn ail yn un o brif wobrau llenyddol yr Urdd. Tonnau oedd testun ei gerdd a bu iddo ddefnyddio'r testun i sôn am hen ŵr ar long yn cael ei draflyncu gan storm, a hyn wedyn yn drosiad estynedig o Gymru.

“Roeddwn i'n gwybod nad oeddwn i wedi ennill y gadair, ond doedd gen i ddim syniad o gwbwl fy mod i wedi cael ail! Roeddwn i'n nerfus ofnadwy'n gwrando ar y dyfarniad. Wrth edrych yn ôl rydw i'n sylweddoli pa mor werthfawr oedd y gweithdai a gefais fel aelod o Sgwad `Sgwennu Gwynedd. Cefais gwrdd â rhai o lenorion mwyaf Cymru, gan gynnwys mynd ar daith deuddydd i Lundain yng nghwmni'r diweddar Iwan Llwyd. Mi fyswn i'n annog aelodau'r Sgwadiau `Sgwennu i wneud yn fawr o'r profiadau y maent yn eu cael, i fwynhau eu hunain ac i gystadlu mewn cystadleuaeth megis rhai'r Urdd”.

Creu Dau Sgwad Cymraeg Newydd

Mae Llenyddiaeth Cymru yn hynod falch o gyhoeddi fod dau Sgwad newydd wedi eu sefydlu yn ne Cymru.
Bu i Sgwad `Sgwennu Cymraeg Abertawe gwrdd fis Mawrth yng Nghanolfan Dylan Thomas gyda’r prifardd Tudur Dylan Jones. Disgyblion o Ysgol Gyfun Gwyr yw craidd y Sgwad ar hyn o bryd, ond gobeithir denu aelodau o Ysgol Bryntawe ac Ystalyfera maes o law. Gellir darllen ffrwyth y gweithdy trwy glicio yma.Ddydd Mercher, 2 Mehefin, bydd Sgwad `Sgwennu Cymraeg Ceredigion yn cyfarfod am y tro cyntaf ar faes Eisteddfod yr Urdd yn Llanerchaeron. Wedi trafodaethau rhwng Llenyddiaeth Cymru, staff Pentre Bach a staff adran addysg Cyngor Sir Ceredigion, daeth i'r amlwg fod angen Sgwad Cymraeg newydd yng ngwaelod y sir, yn ychwanegol at y rhai sydd eisoes yn bodoli ac yn cwrdd yng Nghanolfan y Celfyddydau, Aberystwyth. Bydd y Sgwad newydd yn ymgartrefu ym Mhentre Bach, ar set y gyfres deledu i blant sy'n dwyn yr un enw. Dymuniad T. Llew Jones oedd gweld Pentre Bach yn dod yn rhyw fath o ganolfan ysgrifennu i blant, felly pa well lle i'r Sgwadwyr feithrin eu doniau. Y bardd ifanc Hywel Griffiths fydd yn arwain sesiwn gyntaf y Sgwad, a bydd modd darllen eu gwaith yma yn fuan.

Dilyn Ôl Troed Kate Roberts

 Llongyfarchiadau mawr i Grug Muse o Fron, Caernarfon sy'n aelod blaenllaw o Sgwad `Sgwennu Gwynedd am ddod yn fuddugol yng Nghystadleuaeth Stori Fer Kate Roberts (grŵp oedran 12 – 17 oed). Lansiwyd y gystadleuaeth yn Eisteddfod Meirionnydd a'r Cylch, ac fe'i trefnir ar y cyd rhwng Canolfan Cae'r Gors, Cynllun Hyrwyddo Gwynedd a Phrifysgol Cymru. Darllenir y stori ar Radio Cymru a'i chyhoeddi ar wefan Cae'r Gors a Llenyddiaeth Cymru. Rhowch glic yma i ddarllen y stori.

Mastermind Plant Cymru 2009

Llongyfarchiadau enfawr i Joseph Glyn am ennill cystadleuaeth Mastermind Plant Cymru. Mae Joseph yn aelod brwd o Sgwad `Sgwennu Gwynedd.
Gellir darllen rhagor am gamp Joseph trwy glicio yma.
 

Ysgrifenwyr Ifainc yn dathlu deng mlwyddiant y Cynulliad Cenedlaethol

Fis Medi 2009, daeth 58 aelod o Sgwadiau `Sgwennu’r Ifainc o dde Cymru ynghyd yn y Senedd a Thŷ Hywel ym Mae Caerdydd i ddathlu deng mlwyddiant Cynulliad Cenedlaethol Cymru, ac i greu cerddi am y Senedd o dan arweiniad rhai o awduron mwyaf blaenllaw Cymru.

Cyfranogodd 12 Sgwad `Sgwennu o 8 awdurdod lleol i’r digwyddiad, gan gynnwys Abertawe, Blaenau Gwent, Caerdydd, Caerffili, Caerfyrddin, Castell Nedd Port Talbot, Pen-y-bont ar Ogwr a Rhondda Cynon Taf.

Roedd y digwyddiad yn rhan o gynllun Llenyddiaeth Cymru i ddatblygu Sgwadiau `Sgwennu’r Ifainc o ganlyniad i’r nawdd ychwanegol a dderbyniwyd trwy Ddyfarniad Cwmni Disglair Cyngor Celfyddydau Cymru. Tros y ddegawd a fu mae Llenyddiaeth Cymru wedi datblygu nifer o Sgwadiau `Sgwennu trwy gydweithrediad awdurdodau lleol ledled Cymru. Nod Sgwadiau `Sgwennu yw dod o hyd i ysgrifenwyr disglair ym mhob rhanbarth a’u cyflwyno i rai o brif awduron a thiwtoriaid creadigol Cymru. Mae Sgwadiau `Sgwennu’r Ifainc yn croesawu plant sy’n dangos addewid yn eu gwaith llenyddol.

Dywed Peter Finch, Prif Weithredwr Llenyddiaeth Cymru: “Mae Sgwadiau `Sgwennu’r Ifainc Llenyddiaeth Cymru wedi cydio yn nychymyg awduron newydd ar hyd a lled y wlad. Gyda chymorth Gwobr Cwmni Disglair Cyngor Celfyddydau Cymru mae’r Sgwadiau wedi cael y cyfle i weld sut mae’r llywodraeth yn rhedeg, ac wedi profi’n fwy nag abl i ymateb yn greadigol i hyn. Mae dyfodol llenyddiaeth Cymru mewn dwylo da.”
Yn ystod y digwyddiad, cafodd y Sgwadwyr eu tywys ar hyd y Senedd a Thŷ Hywel gan Swyddogion Addysg y Cynulliad, cymerasant ran mewn dadl yn Siambr Hywel yn ogystal â chwrdd ag Aelodau Cynulliad o’u hardal hwy, gan gynnwys Peter Black AC a Nerys Evans AC.

Yn y prynhawn, rhannwyd y bobl ifainc yn dri grŵp i weithio gyda rhai o awduron mwyaf blaenllaw Cymru. Bu’r grŵp Cymraeg yn gweithio gyda Ceri Wyn Jones, un grŵp Saesneg yn gweithio â Robert Minhinnik a’r grŵp Saesneg arall yn gweithio gyda’r Bardd Cenedlaethol, Gillian Clarke. Ysgrifennwyd hanner cant o gerddi yn ystod y diwrnod, a bydd Llenyddiaeth Cymru yn cyhoeddi casgliad ohonynt mewn pamffled i goffau’r diwrnod. Dyma flas o’r gwaith a grëwyd:

Yn y pren fe deimlad oel hanes yn craffu
Trwy'r llechi gwelaf ofal am dreftadaeth
Ar y botymau gwelaf yr iaith Gymraeg yn carlamu.
Trwy'r ffenestri caiff rhyddid lifo
Manon Angharad Gwynant, Bl.9
Sgwad Caerffili

Yn y Senedd mae annibyniaeth yn teyrnasu
Yn y llechi clywaf leisio barn
Yn y gwydr gwelaf dryloywder teg
Yn y bobl teimlaf falchder.
Miriam a Mari
Sgwad Sir Gaerfyrddin

Yn y Bae caiff annibyniaeth ei fagu
Yn y Bae mae llais i Gymru yn tyfu
Yn y seddi mae brwydr yn dechrau
Brwydr enfawr dros ein hawliau.
Anna Richards, 12
Sgwad ’Sgwennu Pen-y-bont